Карелия Республикасы башлыгы грантлары конкурсы кысаларында гамәлгә ашырыла торган «Карелиянең милли мәдәниятендәге хәрби аспектлар» проекты кысаларында «Карелия ресурс иҗтимагый оешмалар үзәге» Ассоциациясе делегациясе Татарстанның Халыклар дуслыгы йортына килде. (ФОТО)
Делегация составына Ассоциациянең генераль директоры Николай Оськин, Суоярвск районының Тарих-туган якны өйрәнү музее җитәкчесе Наталья Ларионова, Суоярвск үзәк китапханә системасы директоры Ольга Кичманюк, «Чулпан» татар мәдәнияте җәмгыяте» Карелия региональ иҗтимагый оешмасы активисты Иркин Мөхәммәтшин кергән иде.
Кунакларны Дуслык йорты директоры урынбасары Наталья Мясникова каршы алды. Ул Татарстан халыклары Ассамблеясе һәм Дуслык йорты, Яшьләр Ассамблеясе эшчәнлеге, оешмалар тарафыннан оештырылучы проектлар һәм чаралар турында сөйләде. Делегация вәкилләре Күпмилләтле якшәмбе мәктәбе, мәгълүмат үзәге һәм Дуслык музеенда булдылар, ТР үзбәк һәм удмурт милли-мәдәни автономияләре рәисләре Абдуманоб Абдусатаров һәм Андрей Герасимов, «Наш дом Татарстан» журналының баш мөхәррире Наталья Вяткина белән күрештеләр.
Очрашу түгәрәк өстәл артында дәвам итте, анда катнашучылар тәҗрибә уртаклаштылар, уртак эш вариантлары турында фикер алыштылар, истәлекле бүләкләр белән алмаштылар.
«Карелиянең иҗтимагый оешмалар ресурс үзәге» Ассоциациясе делегациясе Татарстанга өч көнлек визит белән килде. Кунаклар Кукмара районында булып, матросчы, Суоярвск районын азат итүдә башын салган Бөек Ватан сугышы герое, шагыйрь Нух Идрисов «эзләре» буенча үтте. Иң элек алар Түбән Өскебаш мәктәбендә очрашуда катнаштылар, геройның оныклары, якыннары белән очраштылар, аның истәлегенә куелган һәйкәлгә чәчәкләр салдылар. Аннан соң Нух Идрисовның туган авылы Битләнгердәге нигезенә бардылар, кайткач каберенә салырга дип, туфрак алдылар, шулай ук зираттагы обелиск-һәйкәл янында булдылар.
Дуслык йортының мәгълүмат үзәге