(8 апрель, 2016 ел) Габдулла Кариев исемендәге Казан Татар дәүләт яшь тамашачы театры Россия халыклар Ассамблеясының Рәхмәт хатына лаек булды. Театрның Россия халыкларының этномәдәниятен һәм халыклар дуслыгын ныгытуга керткән өлеше әнә шулай билгеләп үтелде.
Кариев театры 2014 елдан бирле “Театр – Ватанны саклаучыларга” дигән проект кысаларында күп кенә хәрби частьларда булып, Россиянең төрле төбәкләрендә армия сафларында хезмәт итүче якташларыбызга спектакльләр күрсәтте, дип искәртә театрның матбугат хезмәтеннән Ләлә Зәйнуллина.
Театр, әйтик, былтыр Свердловск, Екатеринбург, Ульяновск өлкәләрендә һәм Марий Эл Республикасында, Кырым, Севастополь, Симферополь, Бакчасарай шәһәрләрендә иҗади сәфәрдә булды. Кариевлыларның хәрбиләр белән дуслыгы алга таба да дәвам итә. Быел исә Әстерхан, Калининград өлкәләренә гастрольләр планлаштырылган.