(5 апрель 2021) Татарстанның Халыклар дуслыгы йортында Казан грузиннары милли-мәдәни автономиясенең хисап-сайлау җыелышы узды. Чарада грузин Федераль милли-мәдәни автономиясе президенты Давид Цецхладзе да булды. (ФОТО)
Казан шәһәренең «Сиони» милли-мәдәни автономиясе рәисе, «Күпмилләтле якшәмбе мәктәбе» мәгариф үзәге директоры Майя Хухунашвили Мәскәүдән килгән мәртәбәле кунакка экскурсия үткәрде, Татарстан халыклары Ассамблеясе һәм Дуслык Йорты, якшәмбе мәктәбе эшчәнлеге турында сөйләде.
Экскурсиядән соң Дуслык Йортының концерт залы сәхнәсендә Татарстан Республикасында Туган телләр һәм халыклар бердәмлеге елына багышланган концерт күрсәтелде. Халыклар дуслыгы йортының грузин ансамбльләре җитәкчесе Теа Пертая иҗади номерлар әзерләгән иде. Шулай ук Күпмилләтле якшәмбе мәктәбендә тәрбияләнүчеләр дә вокал номерлары белән чыгыш ясады.
Хисап-сайлау җыелышын сәламләү сүзе белән Татарстан халыклары Ассамблеясе Башкарма комитеты җитәкчесе Константин Яковлев ачты. Давид Цецхладзе шулай ук утырышта катнашучыларны сәламләде.
Казан шәһәренең грузин милли-мәдәни автономисе рәисе Майя Хухунашвили оешманың өч еллык эшчәнлегенә нәтиҗә ясады һәм киләчәккә бурычлар белән уртаклашты.
Утырыш барышында автономиянең ревизия комиссиясе һәм Идарә әгъзалары сайланды. Казан шәһәренең «Сиони» грузин милли-мәдәни автономиясе идарәсе рәисе итеп Майя Хухунашвили яңадан сайланды.
Дуслык йортының мәгълүмат үзәге