Казанның Үзәк стадион бинасында Чечен Республикасы башлыгының Татарстандагы вәкиллеге ачылды. Тантанада Казан мэры Илсур Метшин һәм Грозный мэры Хас-Магомед Кадыйров катнашты. Бу хакта Татарстан башкаласы Мэриясенең матбугат хезмәте хәбәр итә.
Вәкиллек төбәкара мөнәсәбәтләрне үстерү мәсьәләләре буенча фикер алышуда катнашачак һәм халыкка ярдәм күрсәтәчәк.
Чарада катнашучыларга мөрәҗәгать итеп, Метшин бу вакыйганы ике төбәк арасындагы «туганлык мөнәсәбәтләренең яңа бите» дип атады. Ул Грозный шәһәре башлыгын һәм барлык кунакларны сәламләде. Шулай ук Татарстан Республикасы Рәисе Рөстәм Миңнехановның Чечен Республикасы башлыгы Рамзан Кадыйровны бик кадерләвен һәм хөрмәт итүен искәртеп үтте.
«20 елдан артык элек безнең республикалар арасында дуслык һәм хезмәттәшлек турында килешү имзаланды, ә 12 ел элек тугандаш шәһәребез Грозный белән килешүгә кул куйдык», — дип искәртте шәһәр башлыгы.
ТХДЙның мәгълүмат үзәге,
«Татар-информ» материаллары буенча әзерләнде