«Казан Кремле» музей-тыюлыгында Халыкара балаларны яклау көненә багышланган «Без Кремльне яратабыз!» балалар фестивале узды. Чарада Татарстан халыклары Ассамблеясы һәм Дуслык Йорты иҗат коллективлары катнашты.
Спас манарасы янында балаларны әкият геройлары каршы алды. Кремль территориясендә фәнни-танып-белү, күңел ачу, интерактив тематик мәйданчыклар, конкурслар, уеннар, күңелле фәнни экспериментлар, викториналар, мастер-класслар эшләде: әдәби ишегалды, яшь талантлар остаханәсе, Собзмультпарк мәйданчыгы һәм «ШАЯН ТВ» телеканалы, «Естественно, Наука!» кызыклы фән лабораториясеннән фәнни шоулар промо-акциясе, «Яшел планета» экологик мәйданчыгы. Фестивальнең иң яшь тамашачылары бик зур Дуслык билгесен буяу буенча массакүләм флешмобта катнаштылар.
Россия Эчке эшләр министрлыгының Казан буенча ЮХИДИ идарәсе белгечләре акциядә катнашучыларның юл хәрәкәте кагыйдәләрен белүләрен һәм «Каникулларны файдалы уздыр» юл куркынычсызлыгы мәктәбендә велосипед йөртү күнекмәләрен тикшерделәр. «Мин тормышны сайлыйм!» программасы белән «SаMоSтоятельные дети» балалар берләшмәсе коллективы чыгыш ясады. Махсус бәйрәм кунаклары өчен «Әкият» Татар дәүләт курчак театры «Су анасы» спектаклен тәкъдим итте.
Кремль территориясендә Татарстан халыкларының «Уен Фест» II Республика традицион уеннары фестивале дә узды, аның кысаларында Идел буе халыкларының милли уеннары белән интерактив мәйданчыклар оештырылды. Сәхнәдә Татарстан Республикасының төрле шәһәрләреннән һәм районнарыннан килгән балалар коллективлары чыгыш ясады.
Бәйрәмнең Кол Шәриф мәчете янындагы төп сәхнәсендә Казан шәһәренең иҗат коллективлары катнашында «Без Кремльне яратабыз!» бәйрәм фестивале узды.
Казан Кремле материалы тәрҗемәсе