(29 сентябрь, 2015 ел) Казанда Үзбәкстан Республикасының халык артисты Озодбек Назарбеков чыгыш ясады. (ФОТО)
Концерт Татарстанда үткәрелгән Үзбәк халкы мәдәнияты көннәре кысаларында узды. Тамашачылар җырлар тыңладылар, оста башкарылган халык биюләрен дә карый алдылар. Концерт үзбәк җәмәгате өчен мөһим вакыйга, ул халыкка туган ягын искә төшерә. Озодбек Назарбековның ватандашлары әйтүләренчә, мондый чаралар үткәрү нәтиҗәсендә үзбәк халкы ныграк берләшә һәм дуслаша.
Озодбек Назарбековка 40 яшь, шуның яртысын ул сәхнәдә үткәрә. Бу вакыт эчендә Озодбекның сәләте күпләр тарафыннан яхшы бәяләнгән. Ул Үзбәкстан Республикасының халык артисты. Соңгы вакытта Россия буенча да еш гастрольләргә чыга. Үз концертларын билгеле бер калыпларга салынмаган дип әйтә. Ә җырланасы җырлар исемлеге фәкать тамашачыларның кәефенә карап сайлана ди.
“Барысы да үзебезнекеләр. Матур итеп каршы алалар, сөенәләр. Безнең концертларга рус, татар, азербайҗаннар кебек башка милләт кешеләре дә килүгә мин һәрчак куанам. Сәнгатьнең чикләре юк, ул төрле телләргә бүленеп каралмый. Сәнгатьнең көче нәкъ менә шунда”, — дип сөйләде Үзбәкстан Республикасы халык артисты Озодбек Назарбеков.
Русалина Гайнатулина,
Татарстан халыклары Дуслык Йорты мәгълүмат үзәге