(5 август, 2015 ел) Конкурс программасында 50 фильм катнаша
Казан XI Халыкара мөселман киносы фестивале конкурс программасында 50 фильм катнаша. Моннан тыш, фестиваль кунакларына киңкырлы параллель программалар да тәкъдим ителәчәк.
Россиядә Әдәбият елы булганлыктан, параллель программаларның берсе шуңа багышланачак. “Литература широким экраном” программасында рус һәм татар язучылары әсәрләре буенча төшерелгән фильмнарны күрергә мөмкин. “Татарстан: на фронте и в тылу” программасы исә Бөек Ватан сугышында Җиңүнең 70 еллыгына багышлана.
“Ислам и просвещение” программасында мөселман мәгърифәтчеләренә багышланган фәнни-популяр фильмнар, мөселман мәдәниятен, аның таралышын, чагылдырган документаль кинокартиналар урын алган. Мөһаҗирлек, гастарбайтерлар, үз юлыңны эзләү кебек уртак мәгънәгә ия фильмнар “Свой среди чужих” блогына берләштерелгән. “Синема Фарси” программасында Иран, Әфганстан, Таҗикстан, ә “Азиатская волна” программасында Кытай, Бангладеш, Корея фильмнарын тамаша кылырга мөмкин. “Регион.ру” параллель программасында Россиянең заманча режессерлары эшләре тәкъдим ителә.
“Окно в Европу” программасы үзе берничә блоктан торачак, дип хәбәр итә оештыручылар.
Мәгълүмат http://www.tatar-inform.ru/ сайтыннан алынды.