(9 май 2018) «Үлемсез полк» йөреше колонналарының берсен Татарстан халыклары Ассамблеясе һәм Яшьләр Ассамблеясе вәкилләре төзеде. Алар Бөек Ватан сугышында җиңү яулаган илнең күпмилләтлелеген күрсәтү максатыннан милли киемнәр кигәннәр иде.
Быел акциядә катнашучыларның саны узган елныкыннан 40 меңгә артыгырак булды. Йөреш башланганчы ук колонна Ирек мәйданыннан «Корстон» мәдәни-күңел ачу комплексына кадәр сузылган иде. «Үлемсез полк» йөреше Карл Маркс, Лобачевский, Кремль урамнары аша үтте һәм Меңъеллык мәйданында төгәлләнде.
Үз туганнарының портретларын тотып, колоннада Татарстан Республикасы Президенты Рөстәм Миңнеханов, Татарстан Республиканың Дәүләт Киңәшчесе Минтимер Шәймиев, Татарстан Республикасы Дәүләт Советы рәисе, Татарстан халыклары Ассамблеясе рәисе Фәрит Мөхәммәтшин һәм башкалар үттеләр.
Татарстан халыклары Ассамблеясе активистлары бергәләшеп Бөек Ватан сугышы белән бәйле булган җырларны башкардылар: «Катюша», «День Победы», «Смуглянка» һәм башкалар. Һәр катнашучы кулына фотосурәтен тоткан үз герое турында сөйләргә әзер иде.
Халыклар Дуслыгы йортының мәгълүмат үзәге