«Чулпан» мәдәният үзәгендә Әзербайҗан мәдәнияте көненә багышланган концерт булып узды. Ел саен чараның оештыручылары булып «Татарстан Республикасының Әзербайҗан милли-мәдәни автономиясе» тора.
Концерт залына кергәнче милли атрибутика белән оештырылган күргәзмәне күрү мөмкинлеге каралган иде. Кунакларны милли костюмнарда яшь җәмгыять активистлары каршы алды.
Сәхнәдән сәламләү сүзләре белән Бәһрам Мостафаев чыгыш ясады. Ул барлык гаиләләргә дә иминлек, тыныч күк һәм бәхет теләде. Чарада Бәһрам Мостафаевка Татарстан Республикасы Дәүләт Советы Рәисе Фәрит Мөхәммәтшин исеменнән Рәхмәт хаты тапшырылды. Шулай ук, активистларга хәйрия эшчәнлеге һәм Татарстан Республикасында әзербайҗан халкының мәдәниятен саклауга һәм үстерүгә керткән өлешләре өчен Ассамблея һәм Татарстанның Халыклар Дуслыгы йорты исеменнән Рәхмәт хатлары бирелде. Хатларны Ренат Вәлиуллин һәм Тимур Кадыйров тапшырдылар.
«Евровидение – 2011» җыр бәйгесе җиңүчеләре Эльдар Гасыймов һәм Нигяр Җамал — бәйрәмнең төп кунаклары булдылар.
ТХДЙның мәгълүмат үзәге