Татарстанның Халыклар дуслыгы йортында «Дөнья энҗесе» Халыкара матурлык һәм талант бәйгесенең сайлап алу этабы узачак. «Дөнья энҗесе» – ул яшьләрдә матурлык, толерантлык, хөрмәт, аралашу культурасы һәм аралашу сәнгатен тәрбияләүгә юнәлдерелгән мәдәни-массакүләм чара.
Конкурсның максаты — Татарстан Республикасында яшәүче халыклар һәм чит илдән килеп укучылар арасында дуслыкны һәм татулыкны ныгыту, шулай ук талантлы яшьләрне барлау, иҗатны популярлаштыру, дөнья халыкларының мәдәниятен, гореф-гадәтләрен саклау, алар арасында иҗтимагый, социаль һәм мәдәни элемтәләрне үстерү.
Татарстан халыклары Ассамблеясенең милли-мәдәни автономияләре (үзбәк, төркмән, таҗик) бу конкурска үз вәкилләрен сайлап алу буенча берничә конкурс уздырган инде. Башка катнашучылардан гаризалар 10 апрельгә кадәр кабул ителде.
Сайлап алу туры 16 апрельдә 13:00 сәгатьтә башлана.
Конкурсны оештыручылар: Казан шәһәренең балалар һәм яшьләр эшләре комитеты, Татарстан халыклары Яшьләр Ассамблеясе, Татарстан Республикасы Яшьләр эшләре министрлыгы, Казан шәһәренең чит ил студентлары һәм аспирантлары ассоциациясе.
Дуслык йортының мәгълүмат үзәге