(3 гыйнвар, 2017 ел) Быел Татарстан Республикасының симфоник оркестры үзенең “Мирас” татар музыкасы фестивале концертларын 15, 18, 22 февраль көннәрендә тәкъдим итә. Оркестрның рәсми сайтында концертлар афишасы урнаштырылган.
Концертлар С. Сәйдәшев исемендәге Зур концертлар залында узачак.
Фестиваль 15 февральдә Нәҗип Җиһановның «Кырлай» симфоник поэмасы белән ачыла. Аны композитор Г.Тукайның «Шүрәле» әкияте буенча язган. Шулай ук оркестр Нәҗип Җиһановның 9нчы симфониясен, симфоник оркестр өчен сюитасын әзерли. Дирижер — Александр Сладковский.
Башлана – 18.30.
18 февраль көнне Салих Сәйдәшевның “Сүнгән йолдызлар” музыкаль драмасына увертюра, Александр Ключаревның “Идел симфониясе”, Мансур Мозаффаровның “Скрипка белән оркестр өчен 1нче концерты” һәм А.Миргородскийның Салих Сәйдәшев җырлары темасына увертюра-фантазиясе башкарылачак. Солист — Елена Рольбина, дирижер — Рөстәм Абязов.
Башлана – 17.00
Фестивальнең өченче көнендә – 22 февральдә хәзерге композиторларның әсәрләре яңгыраячак. Программада: Луиза Хәйретдинова, “Яшьләр увертюрасы”; Мирсәет Яруллин “Балалар сюитасы”; Ренат Еникеев “Симфоник оркестр өчен рапсодия”; Рәшит Кәлимуллин “Виолончель белән оркестр өчен концерт”; Мәсгудә Шәмсетдинова «Дала» симфоник дастаны; Резеда Әхиярова «Алтын Урда» балетыннан «Көрәш». Солист — А.Дульнев, дирижер — Айрат Ишморатов.
Башлана – 18.30.