Татарстанның Халыклар дуслыгы йортында агымдагы миграция мәсьәләләре хакында фикер алышу буенча түгәрәк өстәл узды. Анда Татарстан халыклары Ассамблеясе һәм Халыклар дуслыгы йорты җитәкчелеге, көч структуралары, хакимият органнары һәм милли-мәдәни оешмалар вәкилләре катнашты. (ФОТО)
Чара Төркия һәм Сириядәге җир тетрәү корбаннары, шулай ук күптән түгел бакыйлыкка күчкән Казан поляклары оешмасы җитәкчесе Станислав Козловски истәлегенә бер минутлык тынлык белән башланды.
Утырыш барышында ТР буенча ЭЭМ Миграция мәсьәләләре идарәсе башлыгы урынбасары Марат Галиев, Федераль суд приставлары хезмәтенең ТР буенча идарәсе Башкарма производствосы бүлеге инспекторы Искәндәр Билалов һәм РФ Юстиция министрлыгының ТР буенча идарәсе башлыгы урынбасары Татьяна Кравченко чыгыш ясады.
Эчке эшләр министрлыгы мәгълүматларына караганда, 2022 елда Татарстанда миграция исәбенә 320 меңнән артык кеше куелган. Гадәттәгечә, мигрантларның күпчелеге (77 меңнән артык) Татарстанга эш максаты белән килгән. 2022 елда республикага 38 мең чит ил гражданы килгән.
Милли-мәдәни оешмалар вәкилләре көч структуралары һәм хакимият органнары вәкилләренә закон таләпләренә яки авыр мәсьәләләрне хәл итүгә кагылышлы мөһим сораулар бирделәр.
Дуслык йортының мәгълүмат үзәге