Казан Кремле территориясендә милли аксессуарларны заманча яшьләр модасына кертүгә юнәлдерелгән «Бик матур» проектының йомгаклау чарасы узды. Проект Татарстанның Халыклар дуслыгы йорты булышлыгы белән «Ялкын» журналы тарафыннан оештырылды.
Проектның максаты — яшьләрне заманча мода белән таныштыру, Татарстан Республикасы территориясендә яшәхче халыкларның мәдәниятен һәм гореф-гадәтләрен саклау һәм үстерү.
Проект кысаларында берничә ай дәвамында журнал битләрендә, Идел буе халыклары киемнәренең милли аксессуарларын кулланып, заманча образлар җыелды. Образларны җыюда профессиональ стилист ярдәм итте. Проект өчен аксессуарларны Татарстан халыклары Ассамблеясының мари, удмурт, чуаш милли-мәдәни автономияләре вәкилләре бирде.
Проектның йомгаклау чарасы буларак мода бәйрәме узды. «Department Models» модель мәктәбе кызлары, кием кибетләреннән алып, милли аксессуарлар белән тулыландырылган яшьләр образларын, шулай ук дизайнер Алексей Дмитриевның «Тарих» заманча керәшен киеме коллекциясен күрсәттеләр.
Мода бәйрәме татар эстрадасының популяр артистлары чыгышлары белән үрелеп барды.
Дуслык йортының мәгълүмат үзәге