(13 ноябрь, 2015 ел) Казанда милләтара гастрономик бәйрәм үтте. Төп шарт булып үз халкыңа хас булган десерт яки камыр ризыгы әзерләү һәм приз өчен көрәшү булды. Чараның оештыручысы – Татарстан халыкларының Яшьләр Ассамблеясы. (ФОТО)
Иртән халыкара сервис колледжында “Татарстан халыклары ашлары” конкурс-фестивале ачылганнан соң, барлык катнашучылар – 13 милләт вәкиле – аш-су бүлмәсенә уздылар. Конкурс кагыйдәләре буенча, бөтен катнашучыларга да десерт әзерләү өчен төгәл ике сәгать вакыт бирелде.
Соңыннан Татарсан халыклары Дуслык Йортында дөньяның бөтен почмакларында яшәүчеләргә хас булган күп төрле тәм-томнар тәкъдим ителде. Тамаша залында барлык катнашучылар да жюри бәясен ишетергә әзер иделәр. Халыкларның тәм-томнарыннан өстәлләр мул булып торды. Экспертлар шулай ук катнашучыларның куелган таләпләрнең барысын да үтәүләрен һәм милли атрибутика белән табынны әйбәт итеп бизәүләрен ассызыклады. Кичә үзе дә концерт программасына һәм мастер-классларга бай булды.
Нәтиҗә ясаганда, жюри җиңүчене билгеләү авыр булды дип белдерде.
1 урын – Рус ашлары (Курник)
2 урын – Әзербайҗан ашлары (Бакинская пахлава)
3 урын – Керәшен ашлары (Покрау бөккәннәре)
Тамашачылар күңелен яулаучы – Төрекмән ашларыннан булган оригиналь ризык – Кадили суйджи булды. Ул “Кабак тәм-томы” дип тәрҗемә ителә.
Венера Каюмова,
Татарстан халыклары Дуслык Йорты мәгълүмат үзәге