(6 март 2020) Татарстанның Халыклар дуслыгы йортында республикада «Нәүрүз» төрки һәм иран халыклары бәйрәмен оештыру һәм үткәрү буенча киңәшмә узды.
Киңәшмәдә республиканың милли-мәдәни автономияләре, Татарстан халыклары Ассамблеясе һәм Халыклар дуслыгы йорты җитәкчеләре, ТР Президенты Аппараты, республика министрлыклары һәм ведомстволары, мәдәният учреждениеләре вәкилләре катнашты.
Татарстан халыклары Ассамблеясе Советы рәисе урынбасары — Ассамбле Советының башкарма комитеты җитәкчесе Николай Владимиров үз чыгышында республика халыкларының милли бәйрәмнәре күпләрне җәлеп итүен әйтеп үтте. Мисалга, узган ел мондый бәйрәмнәрдә (Май чабудан алып Питрауга кадәр) 100 меңнән артык кеше катнашкан.
Татарстан халыклары Ассамблеясе Советы рәисе урынбасары — Татарстанның Халыклар дуслыгы йорты директоры Ирек Шәрипов быелдан башлап төрки һәм иран халыклары бәйрәмен оештыру һәм уздыруда фәнни җәмәгатьчелекнең актив катнашуын әйтеп үтте. Бу — Республика традицион мәдәниятне үстерү үзәге һәм Казан дәүләт мәдәният институты. Шәрипов сүләренә караганда, 2020 елда «Нәүрүз» бәйрәме яңа мәйданда — «Казан ярминкәсе» күргәзмә үзәгендә узачак.
Киңәшмә барышында шулай ук тәүге тапкыр пылау фестивале үткәрү, «Нәүрүз гүзәле» матурлык һәм талант конкурсын оештыру һәм башка мәсьәләләр буенча фикер алыштылар.
Дуслыка йортының мәгълүмат үзәге