(19 март 2021) Татарстанның Халыклар дуслыгы йортында «Нәүрүз гүзәле» матурлык һәм талант бәйгесенең ярымфиналы узды. Конкурсның бу этабында жюри әгъзалары конкурсантларны билгеле критерийлар буенча бәяләде (ФОТО)
Кызлар үзләрен видео-визитка аша таныштырдылар, соңыннан тест биремнәрен үтәделәр.
Кызларны бәяләргә Татарстанның Халыклар дуслыгы йорты директоры урынбасары, ТР Иҗтимагый палатасы Рәисе урынбасары Анастасия Исаева, «Татарстан» ДТРК «Яңалыклар» программасы редакторы һәм алып баручысы Идел Кыямов, «Агыйдел» башкорт сәнгать һөнәрчелеге әйдәп баручы дизайнеры Илдар Гатауллин һәм «Дагыстан халыклары берләшмәсе» төбәк иҗтимагый оешмасы җитәкчесе Шамил Газиев килгән иде.
Ярымфиналда конкурсантлар үзләренең иҗади сәләтләрен күрсәттеләр. Кыргызстан һәм Татарстан вәкилләре туган телләрдә җырлар башкардылар, ә калган кызлар милли биюләр тәкъдим иттеләр. Бу этапта кызлар җыйган баллар финал нәтиҗәләренә турыдан-туры йогынты ясаячак.
Социаль челтәрләрдә «Нәүрүз гүзәле» бәйгесендә катнашучылар өчен тавыш бирү бара. Тавыш бирү нәтиҗәләре буенча «Тамашачылар мәхәббәте Гүзәле» исеменә лаек кыз билгеләнәчәк.
21 мартта Казан ипподромында төрки һәм иран халыкларының «Нәүрүз — 2021» республика бәйрәмен бәйрәм итү кысаларында узачак конкурсның финалында җиңүче игълан ителәчәк.
Дуслык йортының мәгълүмат үзәге