(20 март, 2016 ел) Бөтен фарсы һәм төрки дөньяга кушылып, Казанның Г.Камал исемендәге Татар дәүләт академия театры каршындагы мәйданда яз җитүен — Нәүрүзне бәйрәм иттеләр. Концерт программасын Татарстан халыклары Ассамблеясының төрек милли-мәдәни автономияләре вәкилләре әзерләгән иде (ФОТО).
Кояш календаре буенча язгы көн белән төн тигезләшкән вакытка, 21 мартка, туры килгән бу көн — Үзәк һәм Көнбатыш Азия илләрендә дәүләт дәрәҗәсендәге бәйрәм. Татарстан башкаласында Нәүрүзне татарлар белән берлектә иранлылар, әфган, таҗик, үзбәк, кыргыз, казах, төркмән, әзербәйҗан, төрекләр каршы алды.
Татарстанда Нәүрүз, 2014 елдан, славян халыкларындагы «Масленица» кебек үк, республика статусын алды.
Бәйрәм кунаклары өчен Татарстан халыклары Ассамблеясе составына кергән милли-мәдәни мохтариятләр зур концерт программасы тәкъдим итте. Шулай ук театр каршындагы мәйданда аларның һәркайсы милли көнкүреш, гореф-гадәтләрен, һөнәрчелек осталыгын чагылдырган чатырлар корып, бәйрәмгә килүчеләрне Нәүрүзгә әзерләнә торган тәм-томнар белән сыйлады. Теләгән кешеләр милли уеннарда катнашып, күңел ачты.