(26 апрель 2021) Татарстан Республикасы Президенты Рөстәм Миңнеханов һәм Татарстан Республикасы Дәүләт Киңәшчесе Минтимер Шәймиев бөек татар шагыйре Габдулла Тукай һәйкәленә чәчәкләр салды.
Чара Туган тел көненә һәм Габдулла Тукайның тууына 135 ел тулуга багышланган тантана кысаларында узды.
Чәчәкләр салу тантанасында республика җәмәгатьчелеге вәкилләре, Татарстанның мәдәният һәм сәнгать эшлеклеләре, ТР Дәүләт Советы депутатлары, ТР Президенты Аппараты Җитәкчесе Әсгать Сәфәров, Казан мэры Илсур Метшин, ТР Дәүләт Советы Рәисе урынбасары Татьяна Ларионова катнашты. Чарада шулай ук Татарстанның Халыклар дуслыгы йорты директоры Ирек Шәрипов катнашты.
Искәртеп узабыз, татар шагыйре Габдулла Тукай — рус һәм чит ил классикларының татар теленә күп санлы тәрҗемәләр авторы, татар вакытлы матбугаты башында торган шәхес, үз әсәрләренә иллюстрацияләр керткән беренче мөселман шагыйрьләренең берсе, ә аның каләме астыннан әле дә укытучылар һәм тикшеренүчеләр арасында кулланышта булган уку әсбаплары чыккан.
Дуслык йортының мәгълүмат үзәге