27 июльдә 18.00 сәгатьтә Бауман урамында («Ногай» кунакханәсе янында) татар халык биюе буенча мастер-класс узачак. Чараны Казан Мэриясе үткәрә. Быел бу – шәһәр паркларында һәм скверларында тормышка ашырыла торган «Хәрәкәттә-бәрәкәт» проектының дүртенче дәресе.
Татар биюе буенча мастер-классны «Казан» бию ансамбленең әйдәп баручы солисты, «Мирас» үрнәк бию ансамбле педагог-хореографы, «Танцы на ТНТ» тамашасында катнашучы Рамазан Җамалетдинов, Татарстан Республикасы Дәүләт җыр һәм бию ансамбленең балет артистлары Данил Исхаков һәм Алия Мөхәммәтгалиева, халыкара конкурслар һәм фестивальләр лауреаты, халык биюе педагог-хореографы Сәидә Минебаева үткәрәчәк.
Дәрес тере музыка астында узачак. Бу эштә музыкант – мультиинструменталист Айдар Абдрахимов (гитара), халыкара конкурслар лауреаты, «ТМТВ» һәм «Болгар Радиосы» телевизион премияләре лауреаты Рәзил Камалов (баян) ярдәм итәчәк.
Бу юлы сезне бергәләп татар биюенә өйрәнергә чакырабыз. «Хәрәкәттә – бәрәкәт» чаралары Казан Мэриясе тарафыннан Парклар һәм скверлар дирекциясе белән берлектә июнь-сентябрь айларында үткәрелә. Бу чара Татарстан Республикасы Президенты каршындагы татар телен һәм Татарстан Республикасында яшәүче халыкларның туган телләрен саклау, үстерү мәсьәләләре комиссиясе ярдәмендә гамәлгә ашырыла.