Казанда икенче «Үз телем» проектлар конкурсы старт ала. Аның максаты – балалар һәм яшьләр арасында татар телен өйрәнү һәм татар мәдәниятен үстерү буенча актуаль проектларны булдыру һәм җәелдерү.
Конкурсны оештыручы Казан шәһәре Башкарма комитеты катнашучыларга телне өйрәнүдә гадәти формалардан һәм дискурслардан читкә китәргә һәм үз проектларын һәм телне үзләштерүнең гадәти булмаган форматын тәкъдим итәргә чакыра. Конкурсантлардан татар телен өйрәнүнең нәтиҗәле, стандарт булмаган һәм, иң мөһиме, яшьләр күзлегеннән караганда өстенлекле ысуллары көтелә.
Конкурста мәктәп укучылары һәм студентлар, шулай ук Казанда яшәүче 35 яшькә кадәрге яшьләр катнаша ала. Теләге булганнарга yztelem.ru сайтында 9 июльгә кадәр гариза тутырырга кирәк. Читтән торып сайлап алудан соң жюри әгъзалары конкурсның көндезге этабында үз проектларын тәкъдим итәргә тиешле финалистлар исемлеген төзиячәк. Иң яхшы идеяләр авторлары ике миллион сум күләмендә приз фондын үзара бүлешәчәк.
Исегезгә төшерәбез, «Үз телем» конкурсы беренче тапкыр 2021 елда оештырылды. Ул вакытта 5 проект авторы грант иясе булды: сүзләрне тәрҗемә итү буенча IT-проект, «Яшел китап» яшь натуралистның өстәл китабы, «Бөҗәкләр алдаша беләме?» сабыйлар өчен энциклопедия, татар телендә комикслар һәм «SkyTat» татар теле онлайн-клубы. Алар барысы да уңышлы тормышка ашырылды.
Дуслык йортының мәгълүмат үзәге