(15 октябрь 2018) Казанда V төрки яшьләр фестивале башланып китә. Анда чит ил һәм Россиянең 17 төбәгеннән 70ләп төрки яшьләр активистлары, төрки иҗтимагый оешмалар җитәкчеләре һәм вәкилләре катнашачак.
7 көн дәвамында делегатлар өчен «түгәрәк өстәл», экскурсия, мастер-класслар оештырылачак, яшьләр проектлары презентациясе узачак.
Фестиваль программасының төп темасы булып социаль проектлаштыру һәм грант конкурсларында катнашу торачак. Катнашучылар «Этнографик диктант» һәм «Ана теле» проектлары белән танышачак, Татарстанның танылган җәмәгать эшлеклеләре белән очрашачак, Казанның истәлекле урыннарын һәм шәһәрдә узачак мәдәни чараларны күрәчәкләр. Фестиваль кысаларында ел саен төрки халыклар (алтай, тува халыклары, казахлар һ.б.) тарихы һәм гореф-гадәтләре белән танышу каралган.
Фестиваль төрки яшьләр арасында мәдәниятара аралашуны ныгытуга, шулай ук төбәкләрдә эшләүче төрки яшьләр оешмалары алдында торган авырлыкларны чишүгә юнәлдерелгән, дип хәбәр итә ТР Яшьләр эшләре буенча министрлык матбугат хезмәте.