Бүген Казанда «Эхо веков в истории семьи – Тарихта без эзлебез»VI Шәҗәрә фестиваленә йомгак ясалды. Тантаналы чарада Татарстан Республикасы Рәисе Рөстәм Миңнеханов белән бергә Мәдәният министры Ирада Әюпова да катнашты. Чара Г.Камал исемендәге Татар дәүләт академия театрында узды.
Рөстәм Миңнеханов ассызыклаганча, Россия Президенты игълан иткән Гаилә елында аның кыйммәтләрен үстерүгә, тарихын саклауга игътибар бирү аеруча мөһим. «Һәрбер кеше өчен төп кыйммәт, һичшиксез, аның гаиләсе. Традицион гаилә кыйммәтләрен ныгытуга без аерым игътибар бирәбез. Һәм Шәҗәрә фестивале моңа бик ярдәм итә», — диде Татарстан Республикасы Рәисе.
Ул шәҗәрә тарихына, Татарстан Республикасы тарихына зур игътибар биргәннәре өчен фестивальне оештыручыларга һәм катнашучыларга рәхмәтен белдерде. «Бүген без барыбыз өчен дә үрнәк булган матур гаиләләрне күрдек. Сез — Республиканың, илебезнең нигезе, безнең киләчәгебез. Без сезнең белән горурланабыз!»- дип өстәде Рөстәм Миңнеханов.
Чарада шулай ук Татарстан халыклары Яшьләр Ассамблеясе рәисе урынбасары һәм Татарстанның Халыклар Дуслыгы йортының балалар һәм яшьләр белән эшләү бүлеге мөдире Диләрә Дамар катнашты.
ТХДЙның мәгълүмат үзәге