(2 декабрь, 2016 ел) 7 декабрьдә Казанда М.Сәлимҗанов исемендәге Актерлар йортында “Нур” балалар театр-студиясе “Нәни принц” спектаклен күрсәтәчәк. Антуан де Сент-Экзюпериның танылган әсәре рус телле балаларга татар телендә тәкъдим ителәчәк.
Бу хакта Актерлар йортының матбугат хезмәте хәбәр итә. «Нур» театр-студиясе Актерлар йортында Татарстан Театр әһелләре берлеге тәкъдиме белән 2012 елдан эшләп килә.
Тамашачылар – Казан мәктәпләрендә 1-4 сыйныфларда белем алучы укучылар. Балалар рус телле яшьтәшләренә спектакльне татар телендә уйнап күрсәтүе – аларга татар телен өйрәнергә ярдәм итү максатын тота. Шуңа күрә тамашаны Татарстанның Мәдәният, Мәгариф һәм фән министрлыгы вәкилләре дә карап бәяләячәк.