(22 сентябрь, 2015 ел) Татарстан халыклары Дуслык Йортында Казанның Рерихлар җәмгыяте юбилеена һәм аның алыштыргысыз рәисе Наилә Әбделманованың юбилеена багышланган кичә үтте.
Кичә башланыр алдыннан, техник фәннәр кандидаты, Казанның Рерихлар җәмгыяте рәисе, Россия рәссfмнар союзы әгъзасы Наилә Әбделманова Татарстан халыклары Дуслык Йортының мәгълүмат үзәгендә даими эшләүче Н.К. Рерих картиналары репродукциясе күргәзмәсе белән таныштырды.
2014 елның август аенда Наилә Әбделманова инициативасы буенча Монголиягә халыкара экспедиция оештырылган иде. Ул Урта Азия экспедициясе маршруты буенча төзелде: Казан – Улан-Удэ – Кяхта – Улан-Батыр – Харахорум – Гоби.
Татарстан халыклары Дуслык Йортындагы кичәне ачып җибәргән Наилә Әбделманованың “По местам Рерихов. Свет Монголии” күргәзмәсе нәкъ менә әлеге экспедициянең нәтиҗәсе булды да инде. Фотокартинкаларда автор тарафыннан 1200 метрдан югарырак биеклектә урнашкан илнең табигате, будда монастырь һәм музейлары, шулай ук заманча шәһәрнең атмосферасы гәүдәләндерелгән. Болар белән беррәттән күргәзмәдә Индия, Скандинавия, Тибет буенча сәяхәт вакытында эшләнелгән фотокартиналар да тәкъдим ителгән иде.
Күргәзмәне Татарстан халыклары Дуслык Йортының музей-күргәзмә эшләре бүлеге җитәкчесе Рәсим Мәһдеев ачты. Килгән кунакларга сәламләү сүзләре белән Татарстан халыклары Дуслык Йорты директоры, ТР Дәүләт Советы депутаты Ирек Шәрипов мөрәҗәгать итте.
ТР Мәдәният министрлыгы вәкиле Наилә Мөбәракшина Наилә Әбделманова исеменә Мәдәният министры тарафыннан бирелгән рәхмәт хатын укыды. Сәламләү һәм котлау чыгышлары видео күрсәтү һәм концерт номерлары белән алмашынып бардылар.
Әлеге күргәзмә танылган бурят рәссамы Ширап Доржиевның “Приношение друзьям” экспозициясе белән тулыланды. Экспозициянең нәкъ менә этник колориты үзенә зур кызыксыну уяткан.
Кичәдә барышындагы төп вакыйгаларның берсе – Наилә Әбделманованың “Рерихи Казани” исемле яңа китабын тәкъдим итү булды. Әлеге китапта Татарстан башкаласындагы рерихлар хәрәкәте тарихы чагылыш тапкан.
Татарстан халыклары Дуслык Йорты мәгълүмат үзәге