(13 март 2019) Казан федераль университетының Филология һәм мәдәниятара багланышлар институты холлында «Л.Н.Толстой һәм Г.Тукай» скульптура композициясе барлыкка киләчәк.
Идея буенча, скульптура Лев Толстой, Габдулла Тукай һәм татар-рус телләрендә ике әлифба тоткан кызның фигураларыннан торачак. Фигуралар рельефлы язу хәрефләре һәм язучыларның исемнәре язылган китап рәвешендә декоратив стенка фонында урнаштырылачак. Язучыларның скульптураларының биеклеге 200 см тәшкил итәчәк.
Әлеге композиция ак мәрмәрнең фактурасын һәм текстурасын чагылдыра торган каты композит материалдан төзеләчәк, дип хәбәр итә Казан университетының матбугат хезмәте.
Композицияне ярымтүгәрәк постамент рәвешендәге нигезгә урнаштыру күздә тотыла. Кичке сәгатьләрдә Тукай һәм Толстой образлары силуэтлары институтның панорамалы тәрәзәләре аша күренәчәк.