(16 май 2018) Халыкара гаилә көне уңаеннан Татарстан Республикасы Чистай районының Каргалы авылында «Пар канатлар» традицион һәйрия концерты узды. Чарада Татарстан халыклары Ассамблеясе һәм Халыклар Дуслыгы йорты артистлары да чыгыш ясады.
Чара программасына татар гаиләләренә багышланган әдәби-музыкаль әсәрләр кертелгән иде.
Татарстанның Халыклар Дуслыгы йортыннан солистлар Вадим Захаров, Рүфия Гыйльметдинова һәм Анжелика Вакилова катнаштылар. Концертның режиссеры һәм хедлайнеры – РТ халык артисты, РТ атказанган мәдәният хезмәткәре Фәннүр Хәсәнов.
Әлеге чара – «Татарстан радиосы»нда 20 ел дәвамында эфирга чыгучы «Пар канатлар» радиопрограммасының сәхнәләштерелгән варианты. Бу – проектның үзенчәлеге дә булып тора. Концертның радиочыгарылышы 15 май көнне эфирга чыкты.
Бәйрәмне оештыручы һәм булдыручы – РДТРК «Татарстан» баш редакторы, ТР атказанган мәдәният хезмәткәре, Хөсәен Ямашев исемендәге журналистлар премиясе лауреаты һәм «Бәллүр каләм» республикакүләм конкурсы җиңүчесе Разин Нуруллин.
Киләсе концерт 19 май көнне Татарстанның Яңа Чишмә районы Акбүре авылында узачак.
Халыклар Дуслыгы йортының мәгълүмат үзәге