(9 апрель 2018) Татарстанның Халыклар Дуслыгы йортында Татарстан Республикасы халык шагыйре Роберт Миңнуллинга 70 яшьлеге уңаеннан «Халыклар Роберт Миңнуллинны укый» дип исемләнгән әдәби чара үтәчәк.
Әлеге чара Instagram социаль челтәрендә барган «Халыклар Роберт Миңнуллинны укый» зур акциясенә йомгак ясау булачак. Бу акциядә бөтен дөнья буйлап төрле милләт вәкилләре катнашты. Башкортостан, Чуашстан, Казахстан, Әзербайҗан, Төркия, Германия, Нигерия һәм башка илләр, төбәкләрдә яшүче Татарстан шагыйре иҗатын үз итүчеләр, мәктәп укучылары, яшьләр, сәнгать ителлигенциясе бер ай дәвамында үзләренең видеоэшләрен (Роберт Миңнуллин әсәрләре тәрҗемәсен туган телләрендә сөйләгән видеотасмалар) челтәрдә урнаштырдылар.
Әдәби кичә башланыр алдыннан шагыйрьнең шәхси архивы күргәзмәсе эшләячәк. Ә төп программа кысаларында шагыйрь әсәрләренең төрле телдәге тәрҗемәләре яңгыраячак, «Халыкларны берләштерүдә Роберт Миңнуллин иҗатының роле» фәнни чыгышы ясалачак, Татарстан халыклары Ассамблеясе активистлары һәм Вахитов районының №27 Гимназиясе укучылары иҗади номерлары тәкъдим ителәчәк.
Әдәби чара 11 апрель көнне 14:00 сәгатьтә башлана.
Халыклар Дуслыгы йортының мәгълүмат үзәге