(29 март, 2017 ел) Татарстан халыклары Дуслыгы Йортында мәктәп укучылары арасында татар телендәге республикакүләм ШТК уеннары узды. Уеннар фестиваль форматында оештырылган иде, анда 8 команда катнашты. Шуларның берсе Яр Чаллы шәһәреннән килгән кунаклар иде.
Мәктәп укучылары арасындагы әлеге татар телендәге республикакүләм «Шаяннар Тапкырлар Клубы» уеннары инде 7 нче ел рәттән оештырыла. Оешманың җитәкчесе Гаяз Гыйльманов.
«Бу сезон алдагыларыннан аерылып тора, чөнки без студентлар форматына күчтек, — дип сөйләде яшь җитәкче. — Моңа кадәр уеннарны сентябрь-май аралыгында оештыра идек. Соңыннан аңладык, балалар җәй айларында тик ятмасыннар өчен уеннарның вакытын күчерергә кирәк — гыйнвар-декабрь аралыгына. Ягьни, сезонны яңа уку еллыннан түгел, ә яңа ел башыннан ачып җибәрү».
«Шаяннар Тапкырлар Клубы» катнашучылары — татар телендә әйбәт сөйләшкән яки аны өйрәнергә теләгән балалар. Алар әйтүләренчә, сәхнәдә бу максатка ирешү күпкә җиңелерәк.
Командалар «Визит карточкасы» конкурсында көч сынаштылар. Көлкеле хәлләр, мәзәк-шаяртулар төле булды, чөнки оештыручылар катнашучыларны билгеле бер тема белән чикләмәгәннәр.
«Безнең лига үз атмосферасы белән аерылып тора. «Шаяннар Тапкырлар Клубы» 7 ел аралыгында үз тамашачысын булдырды. Балалар үзләре, әти-әниләре һәм, әлбәттә, татар эстрадасы «йолдызлары» турында шаярталар», — дип сөйләде Гаяз Гыйльманов.
Үз чыгышлары вакытында командалар туган телләрендә дөрес һәм матур сөйләштеләр. 8 команда гран-при өчен берничә номинациядә көч сынашты. Ә уен фестиваль форматында узганга күрә иң мөһиме нәтиҗә түгел, ә катнашу.
Татарстан халыклары Дуслыгы Йорты мәгълүмат үзәге