(11 февраль) Татарстан халыклары Ассамблеясы һәм Дуслык Йортының “Оцнеба” (Хыял) грузин балалар бию ансамбле “Халык ансамбле” исеменә лаек булды.
«Оцнеба» моннан 16 ел элек хореограф Тея Пертаи җитәкчелегендә оешкан иде. Коллектив грузин балаларын гына түгел, Кавказ мәдәниятын үз иткән башка милләт вәкилләре балаларын да бергә туплады.
Биюләр аша балаларда Кавказда яшәүче күпмилләтле халыкның теленә, мәдәниятына, сәнгатенә хөрмәт хисләре тәрбияләнә. Ансамбль бик күп тапкырлар шәһәр, Республика, Бөтенроссия һәм халыкара конкурсларда, фестивальләрдә лауреат, дипломант исемнәрен яулады.
Идел буе халыкларының мәдәниятын, милли төсмерләрен киң җәмәгатьчелеккә җиткерүләре өчен коллектив Россия Президентының Идел буе Федераль округының тулы вәкаләтле вәкиле Дипломы белән бүләкләнде. “Оцнеба” Казанда узган Универсиада вакытында кунакларга төрле милләт вәкилләренең биюләрен күрсәтте.