(24 июль 2019) Татарстанның Халыклар дуслыгы йортында Европада иминлек һәм хезмәттәшлек оешмасының (ОБСЕ) Милли азчылык мәсьәләләре эшләре буенча Югары комиссары Ламберто Заньер җитәкчелегендәге делегацияне кабул иттеләр. (ФОТО)
Кунаклар Халыклар дуслыгы йортына Татарстан халыклары Ассамблеясе Советы рәисе Фәрит Мөхәммәтшин белән очрашудан соң килделәр. Югары комиссардан тыш делегация составында Югары комиссар офисы бүлекчәсе башлыгы Боб Дин, Югары комиссар офисының Өлкән киңәшчесе Захид Мовлазаде, шулай ук РФ Чит ил эшләре буенча министрлыгы гуманитар хезмәттәшлек Департаментының Өченче сәркатибе Екатерина Глазова бар иде.
Кунаклар өчен Дуслык йорты буенча экскурсияне Татарстанның Халыклар дуслыгы йорты директоры, ТР Дәүләт Советы депутаты Ирек Шәрипов, Татарстан халыклары Ассамблеясе Советының башкарма комитеты җитәкчесе Николай Владимиров һәм Татарстан халыклары яшьләр Ассамблеясе рәисе Тимур Кадыйров оештырды.
Экскурсия барышында Ирек Шәрипов бүгенге көндә Татарстан халыклары Ассамблеясе һәм Халыклар дуслыгы йорты эшчәнлегендә негатив һәм ике мәгънәле төшенчәләрдән арыну (мисалга: «толерантлык», «диаспора») эше алып барылу турында сөйләде. Аеруча да «милли азчылык» төшенчәсенә тукталып, Ассамблея эшенең төп принцибын әйтте — «бер халык — бер тавыш». Мондый алым халыкларны һәм милләтләрне «зур» яки «кечкенә»гә бүлми, һәркемгә тигез мөмкинлекләр бирә.
Татарстанның үзбәкләр милли-мәдәни автономиясе җитәкчесе Абдуманоб Абдусатаров оешманың төп эшчәнлеге турында сөйләде: ватандашларга яңа җирлектә җайлашырга булышу, төрле ситуациядә ярдәм кулын сузу.
Рус милли-мәдәни берләшмәсе бүлмәсендә Татарстанның Иҗтимагый палатасы әгъзасы, Татарстан халыклары Ассамблеясе Советы рәисе урынбасары, Татарстанның рус милли-мәдәни берләшмәсе Идарәсе рәисе урынбасары, Казан рус милли-мәдәни берләшмәсе рәисе Ирина Александровская Татарстан территориясендә рус телен һәм мәдәниятен саклау һәм үстерү өлкәсендә чынга ашырылучы проектлар белән таныштырды.
Шулай ук кунаклар Күпмилләтле якшәмбе мәктәбе эшчәнлеге белән дә таныштылар.
Экскурсиядән соң милли-мәдәни автономияләр җитәкчеләре һәм Татарстан халыклары яшьләр Ассамблеясе активы катнашында «түгәрәк өстәл» утырышы узды. Барысы белән дә танышкач, Ламберто Заньер Дуслык һортында үзен Европада иминлек һәм хезмәттәшлек оешмасында кебек хис итүе турында әйтте. Чөнки биредә дә милләтләр һәм дәүләтләр бик киң тәкъдим ителгәннәр, дип аңлатты.
Утырыш барышында яшьләрнең яңа җирлеккә җайлашуы, туган телләрне өйрәнү, милләтара тынычлык һәм татулыкны саклау, милләтара конфликтларны кисәтү турында фикер алыштылар.
Кунаклар Ассамблея һәм Халыклар дуслыгы йорты эшчәнлегенең күпкырлы икәнлеген, шуңа да иҗтимагый тормышта төрле юнәлештә эш алып бару мөмкинлеге булуын әйтте.
«Сездә үзара хезмәттәшлек моделе яхшы җайга салынган. Бу — уңай җирлек тудыру өчен әйбәт», — дип сөйләде Ламберто Заньер.
Татарстан халыклары Ассамблеясе һәм Халыклар дуслыгы йорты тәҗрибәсе белән танышу әлеге оешмаларның практикаларын Европада иминлек һәм хезмәттәшлек оешмасы эше кысаларында куллану өчен файдалы булачак, дип тә әйтте ул.
Халыклар дуслыгы йортының мәгълүмат үзәге