(24 февраль 2021) Лениногорскта Туган телләр һәм халык бердәмлеге елының рәсми ачылышы үтте. Шәһәр халкын әлеге вакыйга белән район башлыгы Рәгать Хөсәенов котлады.
Ул билгеләп үткәнчә, Лениногорск һәм районда туган телләрне саклау һәм популярлаштыру — төп бурычларның берсе.
«Туган тел — чорлар һәм буыннар бәйләнеше, безнең Лениногорск районы территориясендә яшәүче халыкларның телләрен саклау һәм үстерү өчен барлык шартлар да булуы мөһим», — дип билгеләп үтте муниципалитет җитәкчесе.
Татарстан халыклары Ассамблеясе Советы башкарма комитеты җитәкчесе Константин Яковлев Ассамблея Советы Рәисе Фәрит Мөхәммәтшинның Туган тел көне уңаеннан котлавын укыды, республика халкы һәм кунаклары Туган телләр һәм халык бердәмлеге елына багышланган 150 чарада катнаша алачак, дип билгеләп үтте.
Лениногорскта күп еллар рус, татар, чуаш, мордва милләте вәкилләре тату яшиләр, ә соңгы елларда бу шәһәр әзербайҗаннар, әрмәннәр, үзбәкләр, таҗиклар өчен дә икенче ватанга әверелде. Тулаем алганда Лениногорскта барлыгы 25 милләт вәкиле яши.
Лениногорскта яшәүче халыкларның милли күргәзмәсе бәйрәм чарасы кунакларының игътибарын аеруча җәлеп итте. Шулай ук мәдәният сарае сәхнәсендә зур концерт булды, анда артистлар милли биюләр һәм җырлар башкардылар. Һәр чыгыш алкышларга күмелде.
Халыкара туган тел көне кысаларында Лениногорскта күп кенә мәдәни чаралар узды. Төрле мәйданчыкларда офлайн һәм онлайн форматларда туган тел турында иң яхшы шигырьләрне башкару буенча конкурслар, «Туган телдә сөйләш» флешмобы, «Көчле дә ул, бай да, ягымлы да» әдәби җыелышы, спорт чаралары оештырылды.
Татар-информ материалы тәрҗемәсе