Мәскәүдә Татарстан мәдәнияте Көннәрен тантаналы кичә белән тәмамладылар. Биредә республиканың иҗат коллективлары чыгыш ясады.
Чарага килүче кунакларны Татарстан Республикасы Рәисе Рөстәм Миннеханов, Россия Федерациясе Хөкүмәте башлыгы урынбасары Марат Хөснуллин һәм Мәскәү мэры Сергей Собянин сәләмләделәр.
Мәскәүдә ел да үткәрелә торган Татарстан мәдәнияте көннәре 22 нче августтан 24 нче августка кадәр дәвам итте. Мәдәният көннәре кысаларында Росссия башкаласында Татарстан киносы көннәрен уздырдылар. Шулай ук милләттәшләребез Советлар Союзы Герое Муса Җәлил һәм бөек шагыйрь Габдулла Тукай һәйкәлләренә чәчәкләр куйдылар. Аларның рухын искә алучылар арасында Татарстан язучылары һәм иҗат коллективлары да бар иде.
ТХДЙ мәгълүмәти үзәге