(22 сентябрь 2020) Мәскәүнең Милләтләр йорты һәм Поленов исемендәге Россия дәүләт Халык иҗаты йорты мәйданчыкларында ике көнлек форум бара. Татарстан халыклары Ассамблеясе һәм Халыклар дуслыгы йортын соңгы оешманың директоры Ирек Шәрипов тәкъдим итә. (ФОТО)
Форумда халыклар дуслыгы йортлары, милләтләр йортлары, милли мәдәният үзәкләре, Россия һәм БДБ илләре (Казахстан, Кыргызстан, Үзбәкстан) милли мөнәсәбәтләре өлкәсендәге ресурс үзәкләр вәкилләре катнаша. Традицион оффлайн-форматтан тыш чарада ZOOM аша онлайн форматта да катнашырга мөмкин.
Форумның төп максаты ― хезмәттәшлекне киңәйтү һәм тәҗрибә белән уртаклашу. Шулай ук халыклар дуслыгы йорты, милләтләр йорты, халыкларның рухи байлыкларын, үзенчәлекләрен һәм гореф-гадәтләрен саклау буенча милли мәдәният үзәге, милли мөнәсәбәтләр өлкәсендәге ресурс үзәге кебек структура эшендәге иң әйбәт практикалар белән бүлешү, милли (этник) мөнәсәбәтләр өлкәсендәге перспективалы, инновацион технологияләрне ачу һәм кулланышка кертү, Россия Федерациясенең Үзәк Азиянең дустанә дәүләтләре белән мәдәни-гуманитар хезмәттәшлеген үстерү.
Ирек Шәрипов «Милләтара диалог һәм хезмәттәшлек – Халыклар дуслыгы йорты эшчәнлегенең мөһим приоритеты» темасы буенча доклад белән чыгыш ясады. Шулай ук ул «Уңышлы этномәдәни практикаларны ачу һәм масштаблау механизмы буларак милләтара мөнәсәбәтләр өлкәсендәге ресурс үзәкләр» бәхәс мәйданчыгы эшендә катнашачак. Биредә дуслык йортларының ресурс потенциалын коммерцияле булмаган этномәдәни оешмалар үсешендә куллану мәсьәләсе каралачак.
Дуслык йортының мәгълүмат үзәге