(5 апрель, 2016 ел) 10 апрельдә 13.00дә Мәскәү шәһәренең Татар мәдәнияте үзәгендә төрки яшьләр арасында еллык “Нәрсә? Кайда? Кайчан?” уены уздырыла. Ул милли кием темасына багышлана. Уенның бу икенче мәртәбә оештырылуы.
Бу көнне Мәскәүнең иң кунакчыл милли мәйданчыгы – Әсәдуллаев йортының актлар залында, Россия башкаласының татар, чуваш, алан (карачай-балкар), азәрбайҗан, башкорт, кыргыз, кумык һәм якут яшьләре җыелачак. Алар төрки халыкларның милли киемнәре турында алдан әзерләнгән презентацияләрен тәкъдим итәр, чара кунакларының сорауларына җавап бирер дип күзаллана. Җиңгән командаларга бүләкләр тапшыру күздә тотыла. Программада иҗат коллективлары чыгышлары да каралган. Чарага керү ирекле, диелә Мәскәүнең Милләтләр йорты сайтында.