(7 май 2018) Җиңү көне алдыннан М. Горький паркында Мәңгелек ут һәм Билгесез солдат монументына чәчкләр салу тантанасы узды. Бәйрәм чарасында ТР Дәүләт Советы рәисе, Татарстан халыклары Ассамблеясе Советы рәисе Фәрит Мөхәммәтшин катнашты.
Бөек Җиңүнең 73 еллыгына багышланган әлеге акциядә Дәүләт Советы депутатлары, чит ил студентлары, республиканың милли-мәдәни автономияләре җитәкчеләре, яшьләр иҗтимагый оешмалары вәкилләре катнашты. Чара Татарстан халыклары Яшьләр Ассамблеясе тарафыннан оештырылды.
Чәчәк салу тантанасыннан соң акциядә катнашучылар төрле телләрдә Бөек Ватан сугышы турында шигырьләр сөйләделәр.
Республика башлыгы, ТР Дәүләт Советы, Министрлар Кабинеты исеменнән Фәрит Мөхәммәтшин барлык катнашучыларны киләсе Җиңү көне белән котлады. Ул сугыш хәтерен ветераннар һәм тыл хезмәтчәннәре генә түгел, ә яшьләр дә кадерләп саклавын, аларның да бердәм Җиңүнең ничек авыр бирелгәнлеген аңлавын әйтте.
«Без бүген барысына – безнең гражданнар белән беррәттән фашистларга каршы көрәшкән башка ил вәкилләренә – үз хөрмәтебезне җиткерәбез», – дип сөйләде Фәрит Мөхәммәтшин.
Фәрит Мөхәммәтшин сүзләренчә, Татарстан Бөек Җиңүгә зур өлеш керткән.
«Республиканың дүрттән бер өлеше диярлек фронтка озатылган. Калганнар – өлкәннәр дә, хатын-кызлар да, балалар да – Җиңү көнен тылда, басу-кырларда һәм фермаларда, сәнәгать предприятиеләрендә хезмәт куеп якынайтканнар. Кызганыч, 350 меңгә якын татарстанлы сугыштан исән кайтмады, алар бу Җиңү, безнең киләчәгебез өчен яу кырында ятып калды», – дип сөйләде ул.
Составында яшьләр бүлеге дә булган Татарстанның халыклар Ассамблеясе җәмгыятькә төрле халыклар арасында дуслык, татулык һәм тынычлык ничек урнашканын аңлату максатыннан зур хезмәт куя.
«Милли киемнәрен кигән кешеләрне күрү ничек рәхәт, аларның үз теле, гореф-гадәтләре. Ә яхшы традицияләр һәм гореф-гадәтләрдән башка нык дуслык һәм аңлашу да була алмый», – дип сөйләде ТР Дәүләт Советы рәисе.