(6 сентябрь 2019) ТР Дәүләт Советы рәисе, Татарстан халыклары Ассамблеясе Советы рәисе Фәрит Мөхәммәтшин республиканың биш районында эшләүче Дуслык йортларына микроавтобуслардан ачкычлар тапшырды. (ФОТО)
Автобуслар тапшыру тантанасы Татарстанның Халыклар дуслыгы йорты каршындагы мәйданчыкта узды. Транспортны Азнакай, Апас, Чүпрәле, Яңа Чишмә һәм Спасс районнары вәкилләре алды.
«Президент шәһәр һәм муниципаль районнардагы Дуслык йортларының республика уңаена эшләүләрен һәм, аларга һәрьяклап ярдәм итәргә кирәклеген күрә һәм яхшы аңлый. — дип сөйләде Ассамблея Советы рәисе. — Шул ук вакытта республика җитәкчелеге җирлекләрдә милли-мәдәни автономияләрнең иҗат коллективлары эшчәнлеген активлаштыру һәм көчәйтү белән кызыксына. Чөнки коллективлар күрше районнарга концертлар белән чыга, башка шәһәрләрдә һәм районнарда узучы бәйгеләрдә һәм бәйрәмнәрдә катнаша, үз тәҗрибәләре һәм уңышлары белән бүлешә ала. Мондый хезмәттәшлек киләсе Бөек Ватан сугышының 75-еллыгы һәм ТАССРның 100-еллыгы кебек зур юбилей чаралары алдыннан аеруча да мөһим. Бүген тапшырылган автобуслар шушы эшләрдә сезгә ярдәм итсеннәр».
Татарстан халыклары Ассамблеясенең район ресурс үзәкләренә транспорт тапшыру тәүге тапкыр гына үтми. 2016 елны автобуслар Казан шәһәре, Түбән Кама, Нурлат, Тәтеш һәм Менделеевск районнары Дуслык йортларына тапшырылган иде.
Дуслык йортының мәгълүмат үзәге