(8 февраль, 2016 ел) 9 февраль көнне 11.00дә «Ватанга хезмәт итү: ил бердәмлеген нагытуда тарихның роле» темасына Мәскәү («Россия сегодня» ХМА) — Казан («Татар-информ» МА) видеокүпере була.
Советлар Союзы Герое, фашист лагерьлары тоткыны, «Моабит дәфтәрләре» авторы Муса Җәлилнең тууына 110 тулу уңаеннан, бөтен ил буенча татар халкының батыр улына багышланган патриотик акцияләр уздырыла. Чарада катнашучылар Муса Җәлилнең тормышы һәм иҗаты, фашистларга каршы көрәше, шулай ук яшьләрне патриотик тәрбияләү һәм милләтара бердәмлекне ныгытуда тарихның роле турында сөйләячәк.
Мәскәүдән видеокүпердә тарихчы, Мәскәү татарлары җәмгыяте тикшеренүче Марат Сәфәров катнаша. Казан студиясендә сорауларга ТР мәдәният министрының беренче урынбасары Эльвира Камалова, ТР яшьләр эшләре һәм спорт министры урынбасары Рөстәм Гарифуллин, ТР Дәүләт Советы депутаты Разил Вәлиев, «Татарстан халыклары яшьләр ассамблеясе» Советы рәисе Тимур Кадыйров җавап бирәчәк.