(22 февраль, 2016 ел) 2016 елның 15 февралендә татар шагыйре, Советлар Союзы Герое Муса Җәлилнең тууына 110 ел тулды. Шушы вакыйгага багышлап, Казанда, Татарстан Дәүләт сынлы сәнгать музееның “Хәзинә” Милли сәнгать галереясендә күргәзмә ачылды.
Күргәзмәдә Татарстан рәссамнарының 30дан артык хезмәте урын алды. Биредә Харис Якуповның танылган хезмәте – 1944 елда фашистлар тарафыннан җәзалап үтерелгән Муса Җәлилне сурәтләгән “Хөкем алдыннан” әсәрен, Иван Язынинның Муса Җәлил әсәрләренә иллюстрацияләрен – линогравюра техникасында башкарылган график эшләрен күрергә мөмкин.
Шулай ук әле сугышка кадәр Казанда сынчы Садри Ахунов Муса Җәлилне натурадан ясаган бронза бюст, сынчы Васил Маликов 1970 елларда иҗат иткән шагыйрь бюсты игътибарга тәкъдим ителә. Мәгълүм булганча, 1970нче елларда Нәкый Бикташев, Виктор Куделькин, Виктор Аршинов кебек күренекле рәссамнарның иҗатында да Җәлил образы чагылыш таба. Күргәзмә апрель азагына кадәр эшләячәк.