(6 август 2008) Татарстан районнарында «МУВИ Троль» форум-театрын җәелдерү буенча укулар тәмамланды. Әлеге укуларда Татарстан Республикасы буйлап 20 районнан активистлар катнашты.
Өч көн дәвамында барган укуда егетләр һәм кызлар күп төрле аспектлар үзләштерделәр: проблеманы ачыклау методикасы буенча тәҗрибә, форум-театрын оештыру, сценарий язу, аудитория белән эшләү…
«Вакыт чикле булуга карамастан, без әлеге проектны оештыруда эшне нидән башларга һәм аңа кемнәрне җәлеп итәргә кирәклегенә төшендек», — дип сөйләделәр катнашучылар.
Алга таба укуда катнашкан егет-кызларны үз җирлекләрендә ныклы эш көтә: яшьләрне җыю, команда туплау, милләтара һәм динара мөнәсәбәтләргә кагылган иң кискен проблемаларны ачыклау, ул ситуацияне уйнаучы персонажларны билгеләү һәм и сценарий язу.
Исегезгә төшерәбез, «МУВИ» форум-театры — милли сәясәтне чынга ашыру өлкәсендәге яңа юнәлеш. Аны Татарстан халыклары Яшьләр Ассамблеясе вәкилләре алып бара. Форум-театр һәвәскәр актерлар тарафыннан уйналучы театраль куелышлар циклыннан гыйбарәт. Һәр куелышның асылында милләтара конфликт ята, ә соңгы максат — стереотипларны билгеләү һәм алар белән көрәшү.
Халыклар дуслыгы йортының мәгълүмат үзәге