Ил Президенты Владимир Путин имзалаган указ нигезендә 2022 ел Россия халыкларының мәдәни мирасына багышланачак. Документ хокукый мәгълүмат порталында урнаштырылган.
«Халык сәнгатен популярлаштыру һәм мәдәни традицияләрне, тарих һәм мәдәният һәйкәлләрен, этномәдәни күптөрлелекне, барлык халыкларның мәдәни үзенчәлеген һәм этник берләшмәләрне саклап калу максатыннан [кабул ителде бу карар]», — диелә документта.
Президент хөкүмәткә ике ай эчендә оештыру комитеты булдырырга, шулай ук Россия халыкларының мәдәни мирасы елын үткәрү буенча төп чаралар планын эшләргә һәм расларга кушты.
Путин 2022 елны Мәдәни мирас елы дип игълан итү тәкъдимен 2019 елның ноябрендә үк хуплады. Милләтара мөнәсәбәтләр буенча Совет утырышында ул ел программасын «яхшы һәм эчтәлекле» тулыландырырга һәм Россиянең һәр төбәгенең үзенчәлекләрен исәпкә алырга кирәклеген билгеләп үтте.