(25 март 2015) ТР Дәүләт Советының мәгариф, мәдәният, фән һәм милли мәсьәләләр комитеты рәисе Разил Вәлиев КФУның Психология һәм мәгариф институты студентлары белән очрашты.
Очрашу башланганчы, студентлар өчен парламент үзәгенә, Дәүләт Советы тарихы музеена һәм китапханәсенә экскурсия оештырылды.
Булачак татар теле һәм әдәбияты укытучыларына парламент эшчәнлеге турында сөйләгәндә, Разил Вәлиев Татарстанда милләтләр һәм диннәр арасындагы хезмәттәшлек һәм тынычлык өчен законнарның әһәмиятен билгеләп үтте. “Үзара аңлашу, бер-береңнең телен, гореф-гадәтләрен, мәдәниятын хөрмәт итү Татарстан кебек күп милләтле төбәктә тынычлыкның төп шарты булып тора, — диде парламентарий. – Безнең Дәүләт Советы киләчәктә дә җәмгыятебездә тынычлык һәм иминлекне, дуслыкны саклап калу юнәлешендә актив эшләячәк”.
Разил Вәлиев сүзләренчә, татар теле дәресләре санын рус теле дәресләре саны белән тигезләү, ул дәресләрнең сыйфатын яхшырту бурычы, бердәм дәүләт имтиханын туган телдә тапшыру хокукы бирү һәм башка шундый сораулар комитет әгъзалары өчен актуаль эш юнәлешләре булып кала.
Депутат студентларның сорауларына да җавап бирде, дип хәбәр итә парламентның җәмәгатьчелек һәм ММЧ белән үзара эшчәнлек итү бүлеге.
Чыганак: «Татар информ» ИА