11 июнь көнне Кукмара шәһәр тибындагы поселогында (Татарстан) Республикакүләм “Гырон быдтон” удмурт халкы мәдәнияты бәйрәме узачак.
Гырон быдтон — төп бәйрәмнәрнең берсе – мул уңыш сорап дога кылу. Әлеге бәйрәм удмуртларның барлык этник группаларына да таныш дип әйтергә мөмкин, әмма исемнәре төрле: “Гербер” (ягъни, сабаннан соң), “Гершид” (туры тәрҗемә: гери шид, ягъни сабан хөрмәтенә аш (ботка), “Гырон быдтон” (сөрү эшләрен тәмамлау).
Гырон быдтон чәчәк ату чорында, болында бәйрәм ителә. Удмуртлар ышануларына караганда, аларның Вось Аллалары 1 июнь көнне Купала гыйбадәтханәсеннән болыннарга чыгып китә һәм Питрау көнендә (12 июль) кайта. Шуңа күрә бу вакыт аралыгында гыйбадәтханәдә түгел, ә болында дога кылалар.
Гырон быдтон берничә көн дәвам итә: яшьләр әйлән-бәйлән, уеннар уйныйлар, шулай ук ярышлар, атта чабу оештырыла. Ә җиңүчегә бүләк итеп бизәкләп чигелгән сөлгеләр һәм янчыклар бирелә торган булган. Әлеге бүләкләрне кияүдәге хатын-кызлар алдан әзерләгән. Бу көнне туй иткәннәр, яшьләр күмәк күңел ачулар оештырганнар. Бәйрәм итү мул уңыш сорап дога кылу белән тәмамланган.