25 март көнне 11:00 сәгатьтә Казан ипподромы территориясендәге Хан ишегалдында «Нәүрүз» бәйрәме башланып китәчәк. (ВИДЕО)
Нәүрүз яки «Фарсы Яңа елы», — кешелек тарихындагы иң борынгы бәйрәмнәрнең берсе. Аны Кавказ, үзәк һәм көнбатыш Азия һәм Идел буе халыклары үздыра. Нәүрүзне язгы көн-төн тигезлеге чорына туры китереп бәйрәм итәләр. Күп кенә илләрдә һәм аерым республикаларда әлеге бәйрәм уңаеннан озык ял көннәре оештырыла.
Бүгенге көндә Нәүрүз Яңа ел буларак Иран һәм Әфганстан, дәүләт бәйрәме буларак — Таджикистан, Үзбәкстан, Кыргызстан, Казахстан, Төрекмәнстан, Әзребайҗан, Албания, Гыйрак, Һинд, Македония, Төркия илләрендә бәйрәм ителә, шулай ук Россиянең Татарстан һәм Башкортстан республикаларында билгеләп үтелә.
Казанда Татарстан халыклары Ассамблеясе составына керүче милли-мәдәни автономияләр бәйрәм кунаклары өчен махсус зур концерт программасы әзерли, милли стильдә бизәлгән чатырлар корырга әзерләнә. Биредә Нәүрүзне бәйрәм итүче халыкларның милли ризыкларыннан да авыз итәргә мөмкин булачак.
2014 елдан Татарстанда Нәүрүз бәйрәме, «Май чабу» бәйрәме кебек үк, республикакүләм статуска ия. Быел Нәүрүзне билгеләп үтү өчен яңа мәйдан сайланды. Ул — Казанның истәлекле урыннарының берсе булып саналган Казан ипоодромы.
Бәйрәмне Татарстан Республикасы Мәдәният министрлыгы, Татарстан халыклары Ассамблеясе һәм Дуслыгы Йорты, Казан шәһәре мәриясе оештыра.
«Нәүрүз – 2017″нең программасы:
10:00: Кунаклар өчен «Хан ишегалды» ачыла.
11:00: «Җирнең уянуы» театральләшкән хореографик композиция.
11:25: ТР хакимият органнары, Татарстан халыклары Ассамблеясе һәм Дуслыгы Йорты вәкилләре чыгышы.
11:40 — 15:00: Татарстан халыклары Ассамблеясе һәм Дуслыгы Йортының милли коллективлары һәм чакырылган артистлардан бәйрәм концерты.
Татарстан халыклары Дуслыгы Йорты мәгълүмат үзәге