25 июнь көнне Нурлат шәһәрендә (Татарстан) Республикакүләм “Уяв” чуаш халкы мәдәнияты бәйрәме билгеләп үтеләчәк.
“Уяв” – яз һәм җәй айлары бәйрәме. Аның нигезендә аралашу, тарихи гореф-гадәтләргә нигезләнеп чуаш халкы берләшү, мул уңыш, яңгыр сорап табигый көчләргә мөрәҗәгать итү, әйлән-бәйлән һәм яшьләр уеннары оештыру ята.
“Уяв” бәйрәмен уздыру 1940-50 елларда җәелеп китә. Бу вакытта язгы кыр эшләреннән соң авыл халкы җыйнаулашып әйлән-бәйлән уйнаган. 90 нчы еллар башыннан Татарстан халыкларының традициягә кергән бәйрәмнәре һәр авылда, шәһәрдә, районда масштаблы рәвештә уздырыла башлый.
2006 елдан “Уяв” бәйрәме 27% халкы чуашлардан торган Нурлат районында оештырыла башлый. Биредә яшәүче чуашлар бүгенге көнгәчә элекке бабаларының гореф-гадәтләрен, йолаларын, фольклор һәм халык авыз иҗатын саклап кала алганнар. Моңа нәкъ менә “Уяв” чуаш халкы мәдәнияты бәйрәме дәлил булып тора.