(19 октябрь 2019) Татарстан Республикасында эшләүче Халыклар дуслыгы йортлары базасында «Татарча диктант» татар теленнән белемне тикшерү буенча белем бирү акциясе узды. (ФОТО)
Татарстанның Халыклар дуслыгы йортында диктантны арлыгы 50дән артык кеше язды: оешма хезмәткәрләре һәм Татарстан халыклары яшьләр Ассамблеясе вәкилләре.
Яр Чаллы шәһәренең «Чишмә» Халыклар дуслыгы йортында акциядә 46, Түбән Кама Дуслык йортында — 55, Менделеевск Дуслык йортында — 65 һәм Нурлат Дуслык йортында 35 кеше катнашты.
«Текст бик кызыклы иде. Ләкин кайбер авырлыклар да килеп чыкты: кайбер сүләрне ишеткән булсам да, аларны бер тапкыр да язып караганым булмады. Моңа карамастан, диктантны яхшы билгегә яздым дип ышанам», — дип бүлеште хисләре белән яшьләр Ассамблеясе вәкиле Раилә Солтанова.
Диктантның тексты итеп Роберт Миңнуллинның «Мин кулыма китап алам» әсәре алынган иде. Татарстанның Халыклар дуслыгы йортында текстны Казан (Идел буе) федераль университетыннан Гөлфинә Галиуллина укыды.
Акция Россиянең 47 төбәгендә, шулай ук Әзербайҗан, Болгария, Бөек Британия, Германия, Казахстан, Канада, Төркия һәм Берләшкән Гарәп Әмирлекләре кебек чит илләрдә узды.
Дуслык йортының мәгълүмат үзәге