(19 май 2021) Татарстанның Халыклар дуслыгы йорты директоры Ирек Шәрипов исеменә Россия Федерациясе һәм Татарстан Республикасы Иҗтимагый палаталарыннан уртак Рәхмәт хаты килде.
РФ Иҗтимагый палата комиссиясе рәисе Владимир Зорин һәм ТР Иҗтимагый палата рәисе Зилә Вәлиева кул куйган хат текстында ТР Халыклар дуслыгы йорты директорына һәм коллективына ике палата комиссияләренең уртак утырышын әзерләүдә һәм уздыруда ярдәм иткән өчен рәхмәт белдерелә.
Агымдагы елның февралендә Казанда узган утырыш, гомумроссия бердәмлеген ныгытуда мөһим фактор буларак, этномәдәни һәм тел күптөрлелеген саклауга һәм яклауга багышланган иде.
Чара барышында экспертлар Татарстан Республикасында этномәдәни үсеш һәм тел сәясәтенең актуаль мәсьәләләрен карадылар, республикада булган тәҗрибәне анализладылар һәм Татарстан Республикасында игълан ителгән Туган телләр һәм халыклар бердәмлеге елы кысаларында 2021 елга эш планын билгеләделәр.
Утырышта Россия Иҗтимагый палатасы әгъзалары, ФАДН, РФА академик институтлары, Россия Федерациясе халыкларының туган телләрен саклау һәм өйрәнү фонды вәкилләре, Татарстан Республикасы башкарма хакимияте органнары вәкилләре, милли мөнәсәбәтләр өлкәсендәге экспертлар, РФ Президентының Идел буе федераль округындагы вәкаләтле вәкиллеге вәкилләре катнашты.
Дуслык йортының мәгълүмат үзәге