(14 июль 2020) IOS һәм Android платформалары өчен халык әкиятләрен үз эченә алган «Лукоморье» дип аталган кушымта дөнья күргән. Әлеге вакытта ул татар, чуаш, мари, чечен, авар, ненец, мордва, карачай-балкар, рус һәм Кырым татарлары әкиятләреннән тора.
Россиянең Кавказ халыклары конгрессы «НацАкцент»ка хәбәр итүенә караганда, әкиятләрне яздыру эшендә профессиональ актерлар катнашкан. Һәр әсәр сюжет, милли мәдәният, кием һәм билгеле бер халыкның тышкы кыяфәтен сурәтләүче иллюстрацияләр белән бизәлгән.
«Проектыбыз өчен материал туплаган вакытта ике нәрсәгә исебез китте, — дип сөйли әлеге кушымтаны тудыручыларның берсе Таулан Хапчаев. — Бер яктан, илебездә гомер итүче халыкларның әкиятләрендә уртак нәрсәләр бик күп, барлык әсәрләрнең дә диярлек төп максаты – яхшылыкның яманлыктан, киң күңеллелекнең хәйләкәрлектән, юмартлыкның саранлыктан өстен чыгуы. Икенче яктан, уртаклыклар күп булса да, һәр халыкның үзенә күрә үзенчәлеге бар».