Татарстан башкаласында Россия көнен бәйрәм итү традицион рәвештә Дуслык Парады белән башланды. Анда Татарстан халыклары Ассамблеясының милли-мәдәни автономияләре һәм аларың яшьләр хәрәкәтләре вәкилләре, милли иҗат коллективлары һәм Татарстанның Халыклар дуслыгы йорты хезмәткәрләре актив катнашты.
Парад Казан Кремле территориясендә башланды: катнашучылар Сөембикә манарасы янында 33х22 метр зурлыктагы Россия Федерациясе флагын җәйделәр. Маршта төрле милләт вәкилләре үзләренең традицион костюмнарында катнашты.
Парад тәмамлангач, хакимият органнары һәм иҗтимагый оешмалар вәкилләре М.Җәлил һәйкәленә чәчәкләр салдылар.
Алга таба 1 Май мәйданында концерт программасы һәм Россиянең яшь гражданнарына паспортлар тапшыру тантанасы узды. Паспортларны ТР вице-премьеры Ләйлә Фазлыева тапшырды.
Дуслык йортының мәгълүмат үзәге