Казанда Россия көне уңаеннан «Милли — актуаль» фестивале узды. Фестиваль бу көннәрдә традицион рәвештә уза торган масштаблы Дуслык парадыннан башланды. Чарада йөзләгән кеше катнашты: милли-мәдәни автономияләр җитәкчеләре һәм активистлары, милли һәм фольклор иҗат коллективлары вәкилләре, ТР югары уку йортларында белем алучы чит ил студентлары, Татарстанда этномәдәни проектларны һәм программаларны тормышка ашыруда катнашучы хакимият органнары, гражданлык җәмгыяте институтлары вәкилләре . Катнашучыларның күбесе милли киемнәрдән иде.
Мультимедиатәрәзә-портал аша Казанда сәяхәтне Россиянең тугыз зур шәһәрендә күзәтә алдылар: Мәскәү, Санкт-Петербург, Владивосток, Екатеринбург, Калининград, Красноярск, Новосибирск, Ростов-на-Дону һәм «Сириус» федераль территориясе.
Шул ук вакытта Кремль яр буенда «Этномаркет» эшләде, анда милли колоритлы продукция сатып алырга мөмкин иде. Фестиваль милли коллективлар һәм башкаручылар, шулай ук популяр яшьләр фолк-коллективлары катнашында концерт белән тәмамланды.
Чара Татарстан Республикасы Яшьләр эшләре министрлыгы һәм Татарстан Республикасы Мәдәният министрлыгы ярдәме белән Татарстан халыклары Яшьләр Ассамблеясы, Татарстан Республикасы Рус милли-мәдәни берләшмәсе, Татарстан халыклары Ассамблеясы һәм Дуслык йорты белән берлектә оештырыла.
Дуслык йортының мәгълүмат үзәге