(22 март, 2017 ел) Татарстан халыклары Дуслыгы Йортында Россиянең чит ил студентлары Ассоциациясе Президенты Аду Яо Никэз булды. Әлеге визит кысаларында Татарстан халыклары Ассамблеясе һәм Дуслыгы Йорты вәкилләре белән түгәрәк өстәл оештырылды. (ФОТО)
Түгәрәк өстәл утырышында Татарстан халыклары Дуслыгы Йорты директоры, ТР Дәүләт Советы депутаты Ирек Шәрпов, Татарстан халыклары Яшьләр Ассамблеясе җитәкчесе Тимур Кадыйров, Татарстанның гарәп студентлары Берлеге җитәкчесе Алхамсс Ясер Шафик һәм Татарстанның чит ил аспирантлары һәм студентлары Ассоциациясе җитәкчесе Джумагуль Ачылова катнашты.
Сөйләшү барышында Яо Никэз Татарстанда чит ил студентлары белән алып барылучы эшчәнлекне югары бәяләде:
«Мин һәрвакыт Татарстан Республикасындагы эшчәнлекне Россиядәге һәр регион өчен үрнәк мисал буларак китерәм».
Казандагы күптән түгел булып узган күңелсез вакыйгаларга карамастан, уртак эшне дәвам итәргә һәм мәгълүмат кырында уңай контентны үстерергә кирәк, дигән фикергә килделәр очрашу барышында.
Татарстан халыклары Дуслыгы Йорты мәгълүмат үзәге